Kulop I

Uswag, dinhi la kita ha bungsaran pag-istorya kay may lamrag pa.
Oo, dida iton ha atubangan hira Mana Maring nag-ukoy.
Puro na kabagwakan. Hapilan han baya han mga panimalay.
Sobrahay na baynte anyos naman gud an naglabay han pagpundara
Niya tikang han iya pagminaistra. Kakarag la hit nga tuna.
Kay ano ka nanmimiling ha iya? Asya daw, alagid-agid im
Bayhon ha iya han waray pa kaguba han waray kurukarigo.
An suhag ka ngay-an niya? Oo, alakis kay han kinse anyos ak
Bilinbilin kamo ha ak. Ikaw an tres anyos, im maghod puya pa.
Amo adto nga panuig an iya bana, an im amay, bumaya.

Waray na ngay-an kamo kumita ha iya? Mangno patay na gihap
Hiya, it ak la ampo, nangaro hiya ha iya kalugaringon
Hin mga pasaylo han iya damo nga pagsayop kan Mana Maring.
Pastilan, it na iyo amay, han kapinaura han iyo iroy.
Gintagan hin liawan, gutiay nga tindahanay ha merkado.
Hin kamalabad! gin-kerida an disiotso anyos nga kabulig
Ngan lumaspay hira dara kan im nanay hiniposhipos nga mga
Alahas! Siring niya, “Para gud inin hira hit ak mga anak.”

Oday, im nanay lumagapak ha tuna han pakahibaro niya.
Kamagutaw-i, naningkamot hiya panimangno ha iyo ngan han
Pagmaistra. Ugaring, naturnawo hiya.  Waray na pakasulod
Ha iskwelahan. Han ginkuha kamo han kag-anak han iyo amay
Lumagapak na liwat hiya didto ha tuna han iyo bungsaran.
Hadto manggud, pagpukrat han mata, waray na gud hiya mangilala.
Yakan ak Nanay Bising, “Adto hi Maria lumakat may bitbit nga
Asul nga bag.” Tikang gud man hadto, waray na hiya humiling ngan
Umuli ngada ha atubangan. Kun iginkatarapo ha dalan
Bisan pag-asi waray. Nahisabtan ko, didto hiya nakaturog
Ha kamposanto kay mahimyang daw. Nakakaon la adto hiya kun
Di ginbubusyo hi Mana Salbing nga paragputo didto ha Candao.
Danay manggud ni Mana Maring igintakyab iya mga paninda.
Pamilya? Waray hiya iba na pamilya kay ilo adto hiya.

Nakapahuway ha kadayunan hi iyo nanay kaligis niya.
Waray hiya nadara ha ospital kay napurtahan dayon hiya.
An mga taga-Highway an nag-areglar ha iya lubong ngan waray
Lamay. Nakasabot nala kami pagkinabuwasan. Hinin una
La adto nga tuig. Seguro naharap na kay mga singkwenta na
Adto iya edad, waray kumita han dako pa-Maasin nga bus.
Ta anuman, masulod na ak kay baga masirom na. Sige hinay
Nala haim paglakat. Ay anay, hapit na ak mahangalimot,
An asul daw nga bag ni iyo nanay adto kan Mana Salbing anak.
Waray kaano, gin-abrihan nira. Puno hin kodak. Puros kanan bata.